2020 ခုနှစ်အတွင်း ကျင်းပသွားမယ့် PUBG Mobile ပြိုင်ပွဲများအတွက် ဒေါ်လာ (၅) သန်း အသုံးပြုသွားမယ့် Tencent Gaming

2020 ခုနှစ်အတွင်း ကျင်းပသွားမယ့် PUBG Mobile ပြိုင်ပွဲများအတွက် ဒေါ်လာ (၅) သန်း အသုံးပြုသွားမယ့် Tencent Gaming

Tencent Gaming အနေနဲ့ ၂၀၁၉ ခုနှစ် အတွင်းမှာ PUBG Mobile ပြိုင်ပွဲတွေကို အာရှဒေသတွင်း နိုင်ငံအများစုမှာ ကျင်းပပေးခဲ့သလို မကြာသေးမီ အချိန်ကလည်း PUBG Mobile Club Open (PMCO) 2019 Fall Split Global Finals ပြိုင်ပွဲကြီးကို အောင်မြင်စွာ ကျင်းပခဲ့ပါသေးတယ်။ အဆိုပါ ပြိုင်ပွဲကြီး ပြီးဆုံးသွားချိန်မှာ PUBG Mobile Esports ရဲ့ ဒါရိုက်တာဖြစ်သူ James Yang အနေနဲ့ နောက်နှစ်အတွင်းမှာ ကျင်းပသွားမယ့် PUBG Mobile ပြိုင်ပွဲများနဲ့ ပတ်သတ်ပြီး အသေးစိတ် အချက်အလက်တွေကို ထုတ်ပြန် ကြေငြာသွားခဲ့ပါတယ်။

James Yang ရဲ့ ထုတ်ပြန်ကြေငြာချက်များအရ နောက်နှစ်အတွင်းမှာ ကျင်းပသွားမယ့် PUBG Mobile ပြိုင်ပွဲများကို Amateur, Semi-Pro, Professional အဖြစ် အဆင့် သုံးဆင့် ခွဲခြားသတ်မှတ်ပြီး ယှဥ်ပြိုင်ခိုင်းသွားမှာ ဖြစ်တယ်လို့ သိရပါတယ်။

Amateur ပြိုင်ပွဲများကို Campus Championships ပြိုင်ပွဲများ အဖြစ် အမည် ပြောင်းလဲ သတ်မှတ်ကာ ယှဥ်ပြိုင်ခိုင်းသွားမှာဖြစ်ပြီး အဆိုပါ ပြိုင်ပွဲတွေမှာ အနိုင်ရ ဗိုလ်စွဲခဲ့တဲ့ အသင်းတွေ အနေနဲ့ Semi-Pro, Professional PUBG Mobile အသင်းတွေ ပါဝင်မယ့် PMCO နဲ့ Pro League ပြိုင်ပွဲတွေမှာ ဝင်ရောက် ယှဥ်ပြိုင်ခွင့် ရရှိမှာ ဖြစ်ပါတယ်။

နိုင်ငံအဆင့် PMCO ပြိုင်ပွဲတွေ၊ Pro League ပြိုင်ပွဲတွေမှာ အနိုင်ရရှိခဲ့တဲ့ အသင်းတွေ အနေနဲ့ Regional Pro League ပြိုင်ပွဲများမှာ ယှဥ်ပြိုင်ခွင့် ရရှိမှာ ဖြစ်ပါတယ်။ Regional Pro League ပြိုင်ပွဲဆိုတာကတော့ အမေရိကတိုက်၊ ဥရောပတိုက်၊ အာရှတိုက်တို့မှာ ကျင်းပသွားမယ့် ဒေသတွင်း ပြိုင်ပွဲများပဲ ဖြစ်ပါတယ်။

ဒေသတွင်း ပြိုင်ပွဲတွေမှာ (Regional Pro League) အနိုင်ရ ဗိုလ်စွဲခဲ့တဲ့ အသင်းတွေကတော့ ကမ္ဘာ့အဆင့် ပြိုင်ပွဲ (World League) မှာ ဝင်ရောက် ယှဥ်ပြိုင်ခွင့် ရရှိမှာ ဖြစ်ပါတယ်။ World League မှာ ထိပ်သီးအဆင့် ဝင်ရောက်ခဲ့တဲ့ အသင်းတွေ အနေနဲ့ ကမ္ဘာ့ချန်ပီယံရှစ် (World Championship) ပြိုင်ပွဲကြီးမှာ တိုက်ရိုက် ဝင်ရောက် ယှဥ်ပြိုင်ခွင့်ကို ရရှိမှာ ဖြစ်ပါတယ်။

ဒါ့အပြင် Tencent ရဲ့ ထုတ်ပြန်ကြေငြာချက်များအရ လာမယ့်နှစ်အတွင်းမှာ ကျင်းပသွားမယ့် ပြိုင်ပွဲအားလုံးအတွက် စုစုပေါင်း ဆုကြေးငွေ ဒေါ်လာ ၅ သန်း ပေးအပ်သွားမှာ ဖြစ်တယ်လို့ သိရပါတယ်။ PUBG Mobile အနေနဲ့ လက်ရှိအချိန်မှာ Download ဆွဲသူဦးရေ အများဆုံး ဂိမ်းတွေ အထဲမှာ တစ်ခု အပါအဝင် အဖြစ် ရပ်တည်နိုင်ခဲ့ပြီ ဖြစ်ပေမယ့်လည်း Tencent အနေနဲ့ မကျေနပ်နိုင်သေးတဲ့ ပုံပါပဲ။

အခုလို နည်းစနစ်ကျတဲ့ ပြိုင်ပွဲ စီစဥ်မှုတွေ၊ စွဲမက်ဖွယ်ကောင်းတဲ့ ဆုကြေးငွေတွေနဲ့ ၂၀၂၀ ခုနှစ်ကို ဖြတ်သန်းသွားမယ့် PUBG Mobile အနေနဲ့ Esports လောကမှာ အအောင်မြင်ဆုံး Mobile ဂိမ်းအဖြစ် ရပ်တည်သွားနိုင်မလား ဆိုတာကိုတော့ ဆက်လက် စောင့်ကြည့်ရဦးမှာ ဖြစ်ပါတယ်။

REF: AFKGaming