PS5 Consoles တွေကို ၁၀ သန်းကျော်အထိထုတ်လုပ်ပေးသွားမယ့် Sony

PS5 Consoles တွေကို ၁၀ သန်းကျော်အထိထုတ်လုပ်ပေးသွားမယ့် Sony

Sony ဟာ PlayStation 5 Console တွေကို ၂၀၂၀ ခုနှစ်အတွင်းမှာပဲ ၁၀ သန်းကျော်အထိ ထုတ်လုပ်သွားမယ်လို့ သိရှိရပါတယ်။ အစပိုင်းမှာတော့ မတ်လ ၂၀၂၁ အကုန်ပိုင်းလောက်ထိ PS5 Console စက်တွေကို ၅ သန်းကျော်လောက်ပဲ ထုတ်လုပ်တော့မယ်လို့ အစီအစဥ်ချထားခဲ့ပေမယ့် Global Pandemic ကြောင့် ဝယ်လိုအားများနိုင်တာမို့ အခုလို တိုးမြှင့်ထုတ်လုပ်ပေးသွားမှာဖြစ်ပါတယ်။

ဒီလို ထုတ်လုပ်ရေးပိုင်းကို တိုးမြှင့်ထားပေမယ့်လည်း ၂၀၂၀ အတွင်းမှာတော့ Console ၁၀ သန်းလုံး Store ဆိုင်တွေပေါ်ရောက်လာမှာ မဟုတ်ပါဘူး။ ထောက်ပံ့ပို့ဆောင်ရေးပိုင်းတွေ ကြားထဲမှာ ကြန့်ကြာမှုတွေရှိနိုင်တာကြောင့် ၂၀၂၁ လောက်ထိမှပဲ အားလုံးကိုဖြန့်ချိနိုင်မယ်လို့ သိရပါတယ်။

အဓိကကြန့်ကြာနိုင်တဲ့အကြောင်းအရင်းကတော့ သင်္ဘောနဲ့ ကုန်တွေသယ်ယူပို့ဆောင်တဲ့အခါမှာ အကန့်အသတ်တစ်ချို့ ရှိနေတယ်လို့ သိရပါတယ်။ ဘာကြောင့်လဲဆိုတော့ Sony ရဲ့ Console အတော်များများကို တရုတ်ပြည်ကနေ ထုတ်လုပ်ပြီး ပင်လယ်ကနေ ဖြန့်ချိရတာကြောင့် အခက်အခဲတွေရှိနေတာပါ။

Sony အနေနဲ့ Console တွေအပြင် Playstation 5 Dualsense Controller တွေကိုလည်း ပိုပြီးထုတ်လုပ်ပေးသွားမယ်လို့လည်းသိရှိထားရပါတယ်။ အစပိုင်းအစီအစဥ်ချထားတာကတော့ ၁၀ သန်းလောက်အထိထုတ်လုပ်မယ်ဆိုပေမယ့် လက်ရှိမှာတော့ ဒီထက်နှစ်ဆခန့်လောက် ပိုပြီးထုတ်လုပ်နိုင်ပါတယ်။

Ref: IGN, Bloomberg