Team Secret နဲ့ ခဏတာ ပြန်လည် ပူးပေါင်းသွားမယ့် MidOne

Team Secret နဲ့ ခဏတာ ပြန်လည် ပူးပေါင်းသွားမယ့် MidOne

2018-2019 DPC ရာသီ ပြီးဆုံးပြီး သိပ်မကြာခင် အချိန်အတွင်းမှာ မလေရှားနိုင်ငံသား နာမည်ကျော် Mid ကစားသမား တစ်ဦးဖြစ်တဲ့ MidOne အနေနဲ့ Team Secret Dota2 အသင်းရဲ့ ကစားသမား ဘဝကနေ အနားယူသွားခဲ့ပါတယ်။ MidOne အနေနဲ့ နေရပ်နဲ့ ဝေးရာမှာ အချိန်အကြာကြီး နေထိုင်ခဲ့ရတာကြောင့် အခုလို Team Secret Dota 2 အသင်းကနေ အနားယူခဲ့ရတာဖြစ်ကြောင်း တရားဝင် ထုတ်ပြန် ကြေငြာခဲ့သလို အသင်းသစ် တစ်သင်းကို ကိုယ်တိုင်ကိုယ်ကျ တည်ထောင်သွားဖွယ်ရှိကြောင်း အရိပ်အမြွက် ပြောကြားသွားခဲ့ပါတယ်။

ဒါ့အပြင် 2019-2020 DPC ရာသီရဲ့ ဒုတိယမြောက် Major/ Minor လက်ရည်စစ်ပွဲမှာလည်း SEA ဒေသတွင်း နာမည်ကျော် Support ကစားသမား NinjaBoogie နဲ့အတူ လက်တွဲကာ အပျော်သဘော ဝင်ရောက် ကစားခဲ့ပေမယ့်လည်း Open Qualifier အဆင့်မှာတင် ကျရှုံးခဲ့ရပါတယ်။ ယခုအခါမှာတော့ နာမည်ကျော် ကစားသမား MidOne နဲ့ အသင်းဟောင်း Team Secret တို့ ပြန်လည် လက်တွဲရန် အကြောင်းဖန်လို့ လာခဲ့ပြီ ဖြစ်ပါတယ်။

Team Secret အနေနဲ့ မကြာခင် အချိန်အတွင်း စင်ကာပူနိုင်ငံမှာ ကျင်းပသွားမယ့် ONE Esports Dota 2 World Pro Invitational ပြိုင်ပွဲကြီးမှာ ဝင်ရောက် ယှဉ်ပြိုင်သွားမှာဖြစ်ပြီး အဆိုပါ ပြိုင်ပွဲမှာ ဝင်ရောက် ယှဉ်ပြိုင်ရန် Team Secret Dota 2 အသင်းရဲ့ နာမည်ကျော် Pos 4 ကစားသမား Yapzor တစ်ယောက် လိုက်ပါနိုင်ခြင်း မရှိတာကြောင့် MidOne အနေနဲ့ Yapzor နေရာမှာ ဝင်ရောက် ကစားသွားမှာ ဖြစ်ပါတယ်။

One Esports Dota 2 World Pro Invitational ပြိုင်ပွဲကြီးဟာဆိုရင် DPC Point ပေးအပ်သွားမှာ မဟုတ်တဲ့ ပြိုင်ပွဲတစ်ခု ဖြစ်ပေမယ့် စုစုပေါင်း ဆုကြေးငွေ ဒေါ်လာ ၅ သိန်း ချီးမြှင့်သွားမှာဖြစ်တဲ့ ပြိုင်ပွဲကြီး တစ်ခုပဲ ဖြစ်ပါတယ်။ ဒါ့အပြင် အဆိုပါ ပြိုင်ပွဲကြီးမှာ ကမ္ဘာတစ်ဝှမ်းမှ Dota 2 အသင်းကြီးပေါင်း များစွာ ဝင်ရောက် ယှဉ်ပြိုင်သွားမှာ ဖြစ်ပါတယ်။

MidOne အနေနဲ့ Team Secret နဲ့အတူ One Esports Dota 2 World Pro Invitational ပြိုင်ပွဲကြီးမှာ ဝင်ရောက် ယှဉ်ပြိုင်သွားမှာ ဖြစ်တာကြောင့် ဆရာဟောင်းဖြစ်သူ Puppey နဲ့ အတူတကွ ပြန်လည် ယှဉ်ပြိုင်ခွင့်လည်းကို ရရှိနိုင်မှာ ဖြစ်ပါတယ်။

Position အသစ်မှာ ဝင်ရောက် ကစားသွားမယ့် MidOne အနေနဲ့ Team Secret Dota 2 အသင်းနဲ့အတူ One Esports Dota 2 World Pro Invitational ပြိုင်ပွဲကြီးမှာ ယခင် အချိန်တွေတုန်းကလို ကောင်းမွန်တဲ့ အစွမ်းအစတွေကိုပဲ ပြသသွားမလား ဒါမှမဟုတ် ဆရာတပည့် နှစ်ယောက်ပေါင်းပြီး ပျော်ပျော်ပါးပါးကြီး Throw ကျမလား ဆိုတာကိုတော့ ဆက်လက် စောင့်ကြည့်ရဦးမှာ ဖြစ်ပါတယ်။

REF: AfkGaming